Bir şirkətdə ilk həftəmdə mənə marketinq dashboardunu göstərdilər. 40-dan çox qrafik, 6 tab, hər səhər yenilənən rəqəmlər. Soruşdum: bu paneli açandan sonra son dəfə hansı qərarı verdiniz? Cavab sükut oldu.
Problem: 40 qrafik, sıfır qərar
Dashboardlar adətən "hər şeyi görmək" istəyindən doğur. Nəticədə rəqəmlər çoxalır, diqqət isə dağılır. Rəhbər paneli açır, bir neçə yaşıl və qırmızı oxa baxır, bağlayır. Data var, amma hərəkət yoxdur.
Sadə test: paneldəki hər qrafik üçün soruşun, bu rəqəm dəyişsə, kim nə edəcək? Cavab yoxdursa, qrafik də olmamalıdır.
Qayda: bir panel, bir sual
Hər panel bir biznes sualına cavab verməlidir. "Reklam büdcəsini artıraq, ya yox?" "Hansı kanal bu ay geridə qalır?" "Yeni məhsul səhifəsi işləyir?" Sual aydın olanda hansı metrikin lazım olduğu da aydınlaşır.
Qərar xəritəsi
Dashboard qurmazdan əvvəl kiçik bir cədvəl hazırlayıram. Dörd sütun: sual, metrik, hədd və hərəkət.
- Büdcəni artıraq? ROAS [hədəf]-dən yuxarıdırsa, büdcəni artır.
- Funnel harada itir? Addımlar arası konversiyada həftəlik düşüş varsa, UX auditi aç.
- SEO işləyir? Organik gəlir payı rüblük artmırsa, kontent planını dəyiş.
Bu cədvəl hazır olanda dashboard özü 30 dəqiqəlik işdir. Əsas iş qrafik çəkmək yox, bu cədvəli razılaşdırmaqdır.
Rol üzrə panellər
AzInTelecom-da CEO, marketinq və məhsul komandaları üçün ayrı panellər qurduq. Eyni data, fərqli suallar: CEO gəliri və hədəfi, marketinq kanalları, məhsul isə funneli görür.
"Yaxşı dashboard sizə nə baş verdiyini yox, nə etməli olduğunuzu deyir."
Başlamaq üçün 3 addım
- Komandanın hər həftə verdiyi 5 qərarı yazın.
- Hər qərar üçün bir metrik və bir hədd seçin.
- Qalan bütün qrafikləri ayrıca "araşdırma" tabına köçürün.
Bir ay sonra baxın: panel neçə dəfə açılıb və neçə qərara səbəb olub. Bu, dashboardun öz KPI-ıdır.